وتەبێژى یەکێتى: لەگەڵ پارتى ڕێککەوتین ١٨ى مانگ پەرلەمانى کوردستان کۆببێتەوە
سەعدی ئەحمەد پیرە وتەبێژی یەکێتی ڕایگەیاند، لەگەڵ پارتی ڕێککەوتوون ١٨ی مانگ پەرلەمانی کوردستان و ئەنجومەنی پارێزگای کەرکوکیش کۆببنەوە.
دوای کۆبوونەوەی مەکتەبی سیاسی یەکێتی و پارتی لە هەولێر سەعدی ئەحمەد پیرە لە کۆنفڕانسێکی ڕۆژنامەنووسیدا ئاماژەی بەوەکرد، هەردوولایان ڕێککەوتوون لەسەرئەوەی ڕۆژی ١٨ی ئەم مانگە پەرلەمانی کوردستان و ئەنجومەنی پارێزگای کەرکوک لە هەمان ڕۆژدا کۆببنەوە.
هاوکات ڕوونیشیکردەوە، لە ڕۆژانی داهاتوو لیژنەی دیاریکراو بۆ نووسینی پرۆژە سیاسییەکە دەستبەکارببن و لە ناوەڕاستی هەفتەی داهاتوو وەرەقەیەکی هاوبەش ئامادە بکەن و ڕێککەوتنی لەسەر بکرێت.
ئاماژەی بەوەشکردووە، بە هاوکاری حکومەتی هەرێم و پارتی و یەکێتی کێشەکانی بەغدا چارەسەربکرێت و پارێزگارێکیش بۆ کەرکوک هەڵبژێردرێت.
هاوکات مەحمود محەمەد وتەبێژ و ئەندامی مەکتەبی سیاسی پارتیش ڕایگەیاند، لیژنەی ھاوبەشی نوسینی رێککەوتنی سیاسی نێوان یەکێتی و پارتی راسپێردراوە، کە لەچوارچێوەی دیدگای ھەردوو لایەن، ھەرچی زووترە پرۆژەیەک ئامادە بکرێت و لەلایەن ھەردوو مەکتەبی سیاسی پارتی و یەکێتیەوە بڕیاری لێبدرێت و واژۆبکرێت.
ئەوە کۆبوونەوەیەی یەکێتی و پارتی دوای چەندین جار دواخستن دێت دوای ئەوەی کە لە کۆبوونەوەکانی ڕابردوویاندا نەگەیشتبوونە هیچ ڕێککەوتنێک بۆ کابینەی نوێی حکومەت.
