ئەردۆغان هەڕەشە لە كوردستان دەكات
توركیا هەڕەشەی درێژەدان بەو هێرشانە دەكات كە سوپای وڵاتەكەی بۆ سەر باشوور و رۆژئاوای كوردستان ئەنجامیان دەدات.
رەجەب تەیب ئەردۆغان سەرۆك كۆماری توركیا رایگەیاند سوپاكەیان بەنیازە ئۆپراسیۆنی نوێ بۆ فراوانكردنی سنووری ناوچەكانی ئۆپراسیۆنی "قەڵغانی فورات" لە باكوری سوریا دەستپێبكات.
"قەڵغانی فورات" ئەو ئۆپراسیۆنەیە كە توركیا و گروپە چەكدارەكانی سوریای هاوپەیمانی ئەنقەرە، لە 24ی ئابی 2016 تا 29ی ئایاری 2017 دا لەناوچەی جەرابلوسی نێوان هەردوو كانتۆنی كۆبانێ و عەفرین ئەنجامیدا.
هەرچەندە سەرەتای بەرپرسانی توركیا رایانگەیاند بەمەبەستی پاككردنەوەی ناوچەكە لەداعش ئۆپراسیۆنەكەیان ئەنجامداوە، بەڵام دواتر دانیان نا بەوەی ئامانجی شاراوەی ئەو هەنگاوەیان بریتی بووە لە رێگرتن لە بەستنەوەی عەفرین بە دوو كانتۆنەكەی دیكەی رۆژئاوای كوردستان.
ئەردۆغان وەك ئاماژەیەكیش بۆ رۆژئاوای كوردستان رایگەیاند كە بەو ئۆپراسیۆنەیان خەنجەرێكیان لە دڵی دوژمن داوە.
سەرۆك كۆماری توركیا جەختیشیكردەوە لەسەر بەردەوامبوونی ئەو هێرشانەی كە بەپاساوی پەكەكە، بۆ سەر رۆژئاوای و باشووری كوردستان ئەنجامیان دەدەن.
