شؤك : ئاگات لێيه‌تى به‌شى چه‌ند كورسى ناوى ساخته و مردوو هه‌يه له‌تۆمارى ده‌نگده‌رانى هه‌رێم
سەرۆكی فراكسیۆنی یەكگرتو لەپەرلەمانی كوردستان ئاشكرای ده‌كات كه به‌پێی به‌دواداچونه‌كانیان، لیستی تۆماری دەنگدەرانی هەرێمی كوردستان 615 هه‌زار ناوی ساختەو دوبارەو ناوی مردوی تێدایە كە بەشی 30 كورسی پەرلەمانی كوردستان دەكات. ئه‌و به‌پێویستی ده‌زانێت كه ئەو تۆمارە پاكبكرێتەوە پێش هەڵبژاردنەكان.
بەهزاد زێباری سەرۆكی فراكسیۆنی یەكگرتو لەلاپه‌ڕه‌ی فراكسیۆنه‌كه‌ی له‌تۆڕی كۆمه‌ڵایه‌تی فه‌یسبوك نوسیویه‌تی، "عەجیب‌و غه‌ریب ئەوەیە كە بەپێی بەدواداچونێكی وردمان بۆ داتاو ژمارەی ئەو دەنگدەرەرانەی كە لەهەر لەهەڵبژاردنی ساڵی1992وە دەنگیانداوە تا كۆتا هەڵبژاردن لەهەرێمی كوردستان‌و بەراوردمان كردوە بەژمارەی دانیشتوانی هەرێم‌و زیادبونی ساڵانەی دانیشتوان كە پشتمان بەستوە بەداتاكانی وەزارەتی پلاندانان، دەركەوتوە تا ئێستا 615 هەزار ناوی زیادە لەتۆماری دەنگدەرانی هەرێم هه‌یه".
ناوبراو ده‌ڵێت، "بەپێی بەداوداچونەكەمان لەساڵی 1992 یەك ملیۆن‌و 214 هەزار دەنگدەر لەكوردستان هەبووە، تا هەڵبژاردنی ساڵی 2005 ژمارەی دەنگدەران گەیشتۆتە دو ملیۆن‌و 192هەزار 397 دەنگدەر، كە لەماوەی ئەم 12ساڵەدا 975 هەزار دەنگدەر زیادیكردوە كە ساڵانە 75 هەزار دەنگدەر بووە، هەرچەندە ئەم ژمارەیە زۆر لەزیادبونی ئاسایی زیاترە، بەڵام لەماوەی ساڵانی نێوان 2005وە بۆ 2009 ساڵانە 38 هەزار 212 دەنگدەر زیادیكردوەو لە 2009ش تا هەڵبژاردنی 2013، 31هەزارو 438 دەنگدەر زیادبووە، بەڵام بەپێی دوایین ئامار كە دەردەكەوێت ژمارەی دەنگدەرانی هەرێم ساڵی 2017 ، سێ ملیۆن‌و 250 هەزار دەنگدەرە."
سەرۆكی فراكسیۆنی یەكگرتوو ئاماژه بۆ ئه‌وه ده‌كات كه ئەگەر شرۆڤەیەكی داتاكانی سەره‌وە بكرێت، زیادبونێكی زۆر نائاسایی لەژمارەی دەنگدەران هەر لەساڵانی نێوان 1992 بۆ 2005 كە ساڵانە 75 هزار كەس زیاد بوە كە دەبو ژمارەی زیادبونی دەنگدەر لەم ماوەیە ساڵانە لە 55 هەزار دەنگدەر زیاتر نەبوایە.
ئه‌و ده‌ڵێت، هەروەها لەساڵی 2013 بۆ 2017 ساڵانە 194750 كەس زیاد بووە كە تەنها لەماوەی حەوت مانگی نێوان هەردو هەڵبژاردنی پەرلەمانی كوردستان لە 2013 و پەرلەمانی عێراق لە 2014، (202) هەزار دەنگدەر زیاد بووە ئەمەش ژمارەیەكی زۆر زۆرە ، دەبو زیادبونی ژمارەی زیادەی دەنگدەران ساڵانە لە85 هەزار كەس زیاتر نەبوایە.
بەهزاد زێباری به‌پێویستی ده‌زانێت كه كومسیۆنی هەڵبژاردەكانی هەرێمی كوردستان لەژێر چاودێری پەرلەمانی كوردستان هەڵمەتێك بۆ پاكردنەوەی تۆماری دەنگدەران ئەنجامبدات‌و حكومەتی هەرێمیش داتاو زانیارییە راستەقینەكان بداتە كۆمسیونی هەڵبژاردنەكان بۆ ئەوەی لیستێكی راستەقینەی دەنگدەران ئامادەبكرێت‌و بۆ ئەوەی هەڵبژاردنێكی پاك‌و بێگەر لەهەرێمی كوردستان بەڕێوەبچێت.
