یەكەم بەفر لە هەرێم باری و پلەكانی ئەمڕۆی گەرما بەم شێوەیە بوو
بەڕێوەبەرایەتی گشتیی كەشناسی و بومەلەرزەزانی هەرێمی كوردستان ڕای گەیاند، پلەكانی گەرما بەشێوەیەكی بەرچاو بەرەو دابەزین دەچن و لەمڕۆشدا بەرزترین پلەی گەرما كە 30 پلەی سەتی بووە، لە كەركووك تۆمار كراوە.
ئەمڕۆ پێنجشەم پێنجی تشرینی یەكەم، بەرێوەبەرایەتی گشتیی كەشناسی و بومەلەرزەزانی هەرێمی كوردستان پلەكانی گەرمای بەكاتی سەعات 12ی نیوەڕۆ بڵاو كردەوە.
بە پێی خشتەكەی بەڕێوەبەرایەتی گشتیی كەشناسیی و بومەلەرزەزانی هەرێمی كوردستان، ئەمڕۆ بەرزترین پلەی گەرما كە 30 پلەی سەتی بووە لە كەركووك تۆمار كراوە هاوكات لە هەولێر 27 پلەی سەتی و لە سلێمانی 24 پلەی سەتی تۆمار كراوە.
هەر بە پێی خشتەكە كە تەواوی شار و شارۆكەكانی كوردستانی تێدایە، لە هەڵەبجە بەرزترین پلە 27 پلەی سەتی بووە.
هاوكات شایەتحاڵێك لە سنووری باڵەكایەتی بە"وشە"ی ڕاگەیاند كە ئەمڕۆ لە سەرچیاكانی سەكران لە سنووری باڵەكایەتی، یەكەم بەفری ئەمساڵی هەرێمی كوردستان باریوە.
ئەوە لەكاتێكدایە كە پێشتر بەڕێوەبەرایەتی كەشناسی و بومەلەرزەزانی هەرێمی كوردستان پێشبینی كردبوو كە پلەكانی گەرما بەشێوەیەكی خێرا داببەزن.
خشتەی بەرزترین پلەكانی گەرمای ئەمڕۆ.
