د.غالب محەمەد: ئاسایش بۆتە بۆدیگاردی كۆمپانیاكانی سوتەمەنی
دەنگۆی هێنانی 16 تانكەر بەنزینی خراپ بۆناو سلێمانی بڵاوبۆتەوە و سەرۆكی لیژنەی پیشەسازی و وزە لە ئەنجومەنی پارێزگای سلێمانیش دەڵێت "بەڕێوەبەری نەوت و كانزاكانی سلێمانی و بەڕێوەبەری ئاسایشی پێنجوێن بەرپرسن".
د.غالب محەمەد سەرۆكی لیژنەی پیشەسازی و وزە لە ئەنجومەنی پارێزگای سلێمانی بە رادیۆی نەوای وت "دوای ئەوەی شەوی 26 لەسەر 27 ی ئەم مانگە بەمەبەستی رێگریكردن چووە مەرزی نێودەوڵەتی باشماخ، بەڵام شەوی رابردوو بە واژۆی بەڕێوەبەری نەوت و كانزاكانی سلێمانی ئەو 16 تانكەر بەنزینە هاتۆتە سلێمانیەوە كە ئۆكتانەكەی 38.3 بوە، بەڵام بەڕێوەبەری كانزاكان كردویەتی بە 36".
ئاماژەی بەوەشكرد، لەلایەن ئاسایشی پێنجوێنەوە بێڕێزی بەرانبەر كراوە. وتیشی "ئاسایش بۆتە بۆدیگاردی كۆمپانیاكانی سوتەمەنی".
د.غالب محەمەد سەرۆكی لیژنەی پیشەسازی و وزە لە ئەنجومەنی پارێزگای سلێمانی راشیگەیاند، ئەوەی بەرپرسە بەڕێوەبەری نەوت و كانزاكانی سلێمانییە، هەروەها بەڕێوەبەری ئاسایشی پێنجوێن كە سەر بە ئاسایشی سلێمانییە، ئەنجومەنی پارێزگای سلێمانیش بەرپرسە چونكە ماوەی دوو هەفتەیە بە واژۆی 15 ئەندام داواكراوە بەڕێوەبەری نەوت و كانزاكان بانگهێشتی ئەنجومەن بكرێت، سەرۆكی ئەنجومەنی پارێزگای سلێمانی بانگهێشتی ناكات.
